પીંછા વિના મોર ના શોભે,

મોતી વિના હાર ના શોભે,

તલવાર વિના વીર ના શોભે,

માટે તો હું કહું છું કે…

દોસ્તો વિના ઉત્તરાયણમાં ઘરની અગાસી ના શોભે. 

મકરસંક્રાંતિના તહેવારની તૈયારીઓ મોડી રાત સુધી ચાલતી હોય છે. ત્યારબાદ તૈયારીઓ પૂર્ણ થયા બાદ બધા આરામ માટે જાય છે. બધા જ વહેલી સવારે જાગી, નિત્યક્રમ અને નિત્યકામ પૂર્ણ કરી બધા જ સવારનો નાસ્તો કરે છે. ત્યારબાદ મકરસંક્રાંતિની ઉજવણીનો ધમધમાટ શરૂ થાય છે. પોતાની મકરસંક્રાંતિની તમામ સામગ્રી લઈને પોતાના મકાનની અગાસીમાં જાય છે. અગાસી પરથી આકાશનો નજારો જ કંઈક અલગ હોય છે. આકાશમાં ચારેબાજુ પતંગો અને પતંગો જ નજર પડે છે. આખુ આકાશ રંગબેરંગી પતંગોથી સવાઈ જાય છે. મકાનની અગાસી ઉપર નાના બાળકોથી લઈને વૃધ્ધ લોકો પણ પતંગ ઉડાડવાનો આનંદ લે છે. જાણે વૃધ્ધ લોકોને પણ જુવાની આવી હોય તેવો નજારો ઉતરાયણનો હોય છે.

મકરસંક્રાંતિના દિવસે બધા જ લોકો પોતાની ફીરકી અને પતંગો લઈને અગાસી ઉપર ચડી જાય છે. આખું આકાશ પતંગોથી સવાઈ જાય છે. કાપ્યો છે.... કાપ્યો છે.... ના નાદથી આકાશ ગુંજી ઉઠે છે. બધાં જ પોતાની મસ્તીમાં પતંગો ચગાવતા જોવા મળે છે. કપાયેલા પતંગોને લુંટવાની હોડ લાગે છે. લૂંટો... લૂંટો... ના નાદ પણ સાંભળવા મળે છે. કપાયેલી પતંગો લુંટવાનો પણ અનેરો આનંદ થાય છે. આમ, આખો દિવસ પતંગો ઉડાડવામાં, કાપવામાં અને લૂંટવામાં પસાર થાય છે. હવે તો ઉતરાણના બીજે દિવસે " વાસી  ઉતરાયણ " પણ ઉજવવામાં આવે છે.

મકરસંક્રાંતિની ઉજવણીને દિવસે ધ્યાનમાં રાખવાની બાબતો(Things to keep in mind during the celebration of Makarsankranti):

મકરસંક્રાંતિ આમ તો હર્ષ-ઉલ્લાસનો તહેવાર છે, પરંતુ કેટલીક બાબતોનું ઉજવણી દરમિયાન ધ્યાન રાખવું ખુબ જરૂરી છે. ધ્યાન રાખવા જેવી બાબતો નીચે પ્રમાણે છે. 

(૧) પતંગ ચગાવવા માટે મોટાભાગે અગાસીનો ઉપયોગ થાય છે, આથી અગાસી પરથી નીચે ન પડી જવાય તેનું ખાસ ધ્યાન રાખવું જોઈએ.

(૨) ઉંચી પાળી બાંધેલ અગાસી પરથી જ સાવચેતી પૂર્વક પતંગ ચગાવવી જોઈએ. 

(૩) દોરી માંજેલી  હોય તો ખાસ કરીને હાથ અને આંગળીઓની રક્ષા માટે પૂરતું ધ્યાન રાખવું જોઈએ. 

(૪) વહેલી સવારે અને સાંજે આકાશમાં પક્ષીઓની અવર-જવર વધુ હોય છે, આથી પક્ષીઓની રક્ષા માટે આ સમય દરમિયાન પતંગ ન ચગાવવા જોઈએ. 

(૫) પતંગ પકડવા કે લુંટવા માટે રસ્તા પર ન જવુ જોઇએ. 

(૬) પતંગ ચગાવતી વખતે અગાસી પર રહેલા નાના બાળકોનું ખાસ ધ્યાન રાખવું જોઈએ. 

(૭) મકરસંક્રાંતિના દિવસે વાહન ચલાવતી વખતે ખાસ ધ્યાન રાખવું જોઈએ, જેથી દોરી આપણા ગળા કે શરીર પર ન આવે. 

(૮) શક્ય હોય ત્યાં સુધી સંગીતના સાધનોના અવાજ ધીમા રાખો, જેથી આજુબાજુમાં રહેલ બિમાર વ્યક્તિને તકલીફ ન પડે. 

(૯) પતંગ ચગાવતી વખતે વાણી-વિવેક પર ધ્યાન રાખવું, જેથી કરીને બિનજરૂરી ઝગડા નિવારી શકાય. ઉત્સાહના અતિરેકમાં અનિચ્છનીય કોઈ ઘટના ના બને તેનું ધ્યાન રાખો.

"મીઠા ગોળમાં મળી ગયા તલ,

ચગી પતંગ અને ખીલી ગયું દિલ,

જીંદગીમાં આવે ખુશીયોની બહાર

મુબારક તમને મકરસંક્રાંતિનો તહેવાર"